വെള്ളത്തൂവൽ
ഗ്രാമ പഞ്ചായത്ത്

വെള്ളത്തൂവൽ ഗ്രാമപഞ്ചായത്തിന്റെ 2025–26 വാർഷിക പദ്ധതിയിൽ പഞ്ചായത്തിന്റെ സമഗ്ര വികസനം ലക്ഷ്യമിട്ട് വിവിധ മേഖലകളിലായി നിരവധി പദ്ധതികൾ ഉൾപ്പെടുത്തിയിട്ടുണ്ട്. റോഡുകളുടെ അറ്റകുറ്റപ്പണി, ഡ്രെയിനേജ് നിർമ്മാണം, കുടിവെള്ള പദ്ധതികൾ, തെരുവുവിളക്കുകളുടെ പരിപാലനം തുടങ്ങിയ അടിസ്ഥാന സൗകര്യ വികസന പ്രവർത്തനങ്ങൾക്ക് പ്രത്യേക പ്രാധാന്യം നൽകിയിട്ടുണ്ട്. കൃഷി മേഖലയിലെ പച്ചക്കറി, ഫലവൃക്ഷം, ജാതി, വാഴ എന്നിവയുടെ തൈ വിതരണം, ജൈവവള വിതരണം, നെൽകൃഷി പ്രോത്സാഹനം, തരിശുഭൂമി കൃഷിയോഗ്യമാക്കൽ തുടങ്ങിയ പദ്ധതികളിലൂടെ കാർഷിക വികസനം ലക്ഷ്യമിടുന്നു. മൃഗസംരക്ഷണ മേഖലയിൽ കറവപ്പശു വിതരണം, കന്നുകാലിത്തീറ്റ സബ്സിഡി, മുട്ടക്കോഴി വിതരണം, ക്ഷീരകർഷകർക്ക് ഉൽപാദന ഇൻസന്റീവ് തുടങ്ങിയ പദ്ധതികളും നടപ്പാക്കുന്നു. ആരോഗ്യ മേഖലയിലെ ആശുപത്രി മരുന്ന് വാങ്ങൽ, പാലിയേറ്റീവ് കെയർ, ആരോഗ്യകേന്ദ്രങ്ങളുടെ നവീകരണം, ഫിറ്റ്നസ് പാർക്ക് തുടങ്ങിയ പദ്ധതികൾക്കൊപ്പം അങ്കണവാടികളുടെ അടിസ്ഥാന സൗകര്യ വികസനത്തിനും കുട്ടികളുടെ പോഷണം, ആരോഗ്യം, കലാ-കായിക പരിശീലനം എന്നിവയ്ക്കും പ്രാധാന്യം നൽകിയിട്ടുണ്ട്. സ്ത്രീകൾ, വയോജനങ്ങൾ, ഭിന്നശേഷിക്കാർ, പട്ടികജാതി-പട്ടികവർഗ വിഭാഗങ്ങൾ എന്നിവരുടെ ക്ഷേമത്തിനായി സ്കോളർഷിപ്പ്, സ്വയംതൊഴിൽ, മെഡിക്കൽ ക്യാമ്പ്, വിവിധ സഹായ പദ്ധതികൾ എന്നിവയും ഉൾപ്പെടുത്തിയിട്ടുണ്ട്. മാലിന്യസംസ്കരണം, ശുചിത്വ പ്രവർത്തനങ്ങൾ, കുടിവെള്ള സംരക്ഷണം, ജൈവവൈവിധ്യ സംരക്ഷണം, കാലാവസ്ഥാ വ്യതിയാനത്തെ നേരിടുന്നതിനുള്ള പ്രവർത്തനങ്ങൾ എന്നിവയ്ക്കും പദ്ധതിയിൽ പ്രാധാന്യം നൽകിയിട്ടുണ്ട്. പഞ്ചായത്ത് ഓഫീസ് ഉൾപ്പെടെയുള്ള ഘടകസ്ഥാപനങ്ങളുടെ അടിസ്ഥാന സൗകര്യ വികസനം, ഡിജിറ്റൽ സംവിധാനങ്ങൾ, ഉപകരണങ്ങൾ, പൊതുസ്ഥാപനങ്ങളുടെ നവീകരണം എന്നിവയും പദ്ധതിയുടെ ഭാഗമായി ഉൾപ്പെടുത്തിയിരിക്കുന്നതിലൂടെ ജനങ്ങൾക്ക് മെച്ചപ്പെട്ട സേവനങ്ങൾ ഉറപ്പാക്കുന്നതിനും പഞ്ചായത്തിന്റെ സമഗ്രവും സുസ്ഥിരവുമായ വികസനം സാധ്യമാക്കുന്നതിനുമാണ് വാർഷിക പദ്ധതി ലക്ഷ്യമിടുന്നത്.